स्थानीय तह निर्वाचनको पूर्व तयारी

स्थानीय तह निर्वाचनको पूर्व तयारी

स्थानीय तह निर्वाचनको पूर्व तयारी

साझा बोली रेडियो बहसको स्थानीय संस्करणमा उत्पादन भइरहेको कार्यक्रमको ३० औँ भागमा स्थानीय तह निर्वाचनको पूर्व तयारी विषयमा बहस गरिएको छ । बहसमा जिल्ला प्रशासन कार्यालय गुल्मीका प्रमुख जिल्ला अधिकारी पुण्य विक्रम पौडेल र जिल्ला निर्वाचन कार्यालय गुल्मीका निर्वाचन अधिकारी माया कुँवर अतिथिको रूपमा रहनुभएको थियो ।  

सरकारले यही वैशाख ३० लाई स्थानीय तहको निर्वाचनका लागि मिति घोषणा गरेको छ । गुल्मी जिल्लामा १२ वटा पालिका तथा ९३ वटा वडा रहेका छन् । जिल्लाका विभिन्न पालिकाहरूमा मुख्य निर्वाचन अधिकृतको कार्यालय समेत स्थापना गरिएको छ । मुख्य निर्वाचन अधिकृतको कार्यालयमा विभिन्न राजनैतिक दलका उम्मेदवारहरूले उम्मेदवारी दर्ता पछि चुनावी प्रचार–प्रसारमा व्यस्त भइरहेका छन्  । यस पटक गुल्मी जिल्लामा दुई लाख भन्दा बढी मतदाताहरू सहभागी हुँदै छन् । 

जसमा महिला मतदाता १ लाख १४ हजार २ सय १५ मतदाता रहेका छन्। भने पुरुष मतदाता १ लाख १० हजार ५९ जना मतदाता रहेका छन् । अन्य मतदाता २ जना रहेका छन् । यसरी यस जिल्लामा २ लाख २४ हजार २ सय ७६ जना मतदाता यस पटकको निर्वाचनमा सहभागी हुँदै छन् । यस पटक निर्वाचन कार्यालयबाट विशेष प्रकारका मतदाता शिक्षा कार्यक्रम सञ्चालन नभएका कारण नयाँ मतदाताहरूको मतदान बदर हुन सक्ने अधिकांशको भनाइ छ । 

जिल्लामा मतदान स्थलहरूलाई विभिन्न तरिकाले वर्गीकरण गरिएको छ । अतिसंवेशनशिल मतदान स्थलहरूलाई  विशेष सुरक्षाको प्राथमिकतामा राखिएको छ । बहसको क्रममा  प्रमुख जिल्ला अधिकारी पुण्यविक्रम पौडेलले स्थानीय तहको निर्वाचनलाई स्वच्छ, भयरहित वातावरण सम्पन्न गर्न पूर्व तयारीलाई चुस्त, दुरुस्त बनाउने प्रतिबद्धता जनाउनुभएको छ । भने निर्वाचन अधिकारी माया कुँवरले जनतामा निर्वाचनलाई लिएर उत्साह भर्ने कार्यमा निर्वाचन कार्यालयसँगै सबै पक्ष लाग्नुपर्ने विषयमा जोड दिनुभएको छ ।