सुरक्षा संवेदनशीलताका आधारमा निर्वाचन सुरक्षा रणनीति बनाइयो

सुरक्षा संवेदनशीलताका आधारमा निर्वाचन सुरक्षा रणनीति बनाइयो

सुरक्षा संवेदनशीलताका आधारमा निर्वाचन सुरक्षा रणनीति बनाइयो

यही वैशाख ३० गते हुने स्थानीय तहको निर्वाचनका लागि काभ्रेमा सुरक्षा संवेदनशीलताका आधारमा निर्वाचन सुरक्षा रणनीति बनाइएको छ । निर्वाचनमा कुनै पनि किसिमको आपराधिक घटना हुन नदिन भौगोलिक अवस्था र त्यस क्षेत्रमा हुने शान्ति सुरक्षा स्थितिलाई हेरेर रणनीति बनाइएको काभ्रेका प्रमुख जिल्ला अधिकारी हुमकला पाण्डेले बताउनुभयो । रेडियो नमोबुद्ध एफएम १०६.७ मेघाहर्जले उत्पादन गरेको “साझा बोली रेडियो बहस” को ३० औ भागमा प्रमुख जिल्ला अधिकारी पाण्डेले मतदान स्थलको भौगोलिक अवस्थाको विश्लेषण, सुरक्षा संवेदनशीलता, जनशक्ति व्यवस्थापन लगायतका विषयमा सबै तयारी पुरा भएको बताउनुभयो । निर्वाचनका बेला शान्ति सुरक्षाका निम्ति सुरक्षा निकायका प्रमुखसँग पटक पटक बैठक बसी नेपाल प्रहरी,सशस्त्र प्रहरी,नेपाल आर्मी, म्यादी प्रहरीसमेत भर्ना गरी तालिम दिएर सम्बन्धित कार्यक्षेत्रमा पठाइसकेको उहाँले बताउनुभयो । यस्तै निर्वाचन अधिकृत,सहायक निर्वाचन अधिकृत,मतदान अधिकृत,सहायक मतदान अधिकृत लगायत आवश्यक कर्मचारीहरूको व्यवस्थापन पनि गरिसकिएको छ ।

यसैबिच, 

रसुवा जिल्लामा मतदान स्थलको वर्गीकरण गरी शान्ति सुरक्षाको व्यवस्थापन गरिएको छ । जिल्लामा अति संवेदनशील, संवेदनशील र साधारण गरी तिन तहमा मतदान स्थलको वर्गीकरण गरेर सुरक्षाको व्यवस्थापन गरिएको प्रमुख जिल्ला अधिकारी नवराज जैशीले जानकारी दिनुभयो । चार वटा सुरक्षा निकायहरू नेपाल प्रहरी,सशस्त्र प्रहरी,नेपाली सेना, म्यादी प्रहरी तथा आवश्यक कर्मचारीहरूको व्यवस्थापन गरेर सम्बन्धित मतदान केन्द्र तथा स्थलमा खटाई सकिएको छ । ३८ हजार ५ सय ५४ जान मतादाता रहेको रसुवा जिल्लामा भूगोलको हिसाबले मतदान स्थल तथा केन्द्रहरू केही टाढा भए पनि शान्ति सुरक्षाका दृष्टिले सबै राम्रो रहेको उहाँको भनाई थियो । 

यसै गरी निर्वाचनमा मतदाताले सही ढङ्गले मत हाल्ने तरिकाको बारेमा पनि हामीले कार्यक्रममा कुराकानी गरेका थियौ । मत बदर हुन नदिन निर्वाचन आयोगले अघिल्ला निर्वाचनमा मतदाता शिक्षा घरदैलो कार्यक्रम चलाएको थियो,तर निर्वाचन आयोगले यो पटक डिजिटल प्रणालीबाट मात्रै मतदाता शिक्षा कार्यक्रम चलाएको छ ।  निर्वाचनको मिति नजिकिँदै जाँदा मतदाताहरूले सही तरिकाले मत सङ्केत गर्ने बारेमा रसुवाका निर्वाचन अधिकारी श्रीराम थापा सँग कुराकानी गरेका थियौ । साथै कार्यक्रममा काभ्रे र रसुवाका केही नागरिकका आवाज पनि समेटेका थियौ ।