सुर्खेत, चैत्र १९ । भेरीगंगा नगरपालिका ११ रामघाट सुर्खेतमा रामघाट स्वास्थ्यचौकीको सामाजिक परिक्षण अनुगमन कार्यक्रम सम्पन्न भएको छ । स्वास्थ्य सेवाको सार्वजनिक सेवा गुणस्तरियताका लागि उक्त कार्यक्रम गरिएको हो ।
गत बर्ष भएको सामाजिक परिक्षणमा गरिएका प्रतिवद्धता पुरा भए वा भएनन् भनि यस पटक अनुगमनका लागि कार्यक्रम गरिएको जनाईएको छ । गत वर्षको सामाजिक परिक्षणमा स्वास्थ्य चौकीको भवन निर्माण सम्पन्न गर्ने र एम्बुलेन्स किन्ने प्रतिबद्धता गरिएका थिए । ति मध्ये अहिले भवन निर्माण सम्पन्न भएको छ । स्वास्थ्य चौकीमा एम्बुलेन्स ल्याउने प्रतिबद्धता भने पुरा हुन सकेको छैन । स्वास्थ्य संस्थामा एम्बुलेन्स ल्याउने समय फेरी पनि थपिएको छ । शुक्रबार भएको सामाजिक परिक्षणमा स्थानियहरुले स्वास्थ्य चौकीबाट एम्बुलेन्स सेवा र ल्याब सेवा नपाएकाले छिटै नै पाउनुपर्ने माग गरेका छन् । जवाफमा भेरीगंगा नगरपालिका वडा नम्बर ११ का वडा अध्यक्ष तिलकराम डाँगीले आगामी आर्थिक वर्षमा स्वास्थ्य संस्थामा एम्बुलेन्स ल्याउने प्रतिबद्धता जनाउनुभएको छ । सामाजिक परिक्षणमा शहरी स्वास्थ्य एकाई सञ्चालन गर्ने पनि प्रतिबद्धता जनाईएको छ ।
जिल्ला जनस्वास्थ्य कार्यालय सुर्खेतको आयोजना तथा यूएसएआईडीको आर्थिक सहयोग र FHI360 को समन्वयमा सुन्दर नेपाल संस्थाद्वारा सञ्चालित पारस्परिक जवाफदेहिता कार्यक्रम (CS:MAP) को आर्थिक सहयोग र असल शासन क्लब जिल्ला समन्वय समिति सुर्खेतको समन्वयमा कार्यक्रम सम्पन्न भएको पारस्परिक जवाफदेहिता परियोजना सुर्खेतका अभियान सुपरभाईजर गगन खड्काले जानकारी दिनुभयो ।
सामाजिक परिक्षणमा पारस्परिक जवाफदेहिता परियोजना अन्तर्गत गठन भएको रामघाट स्थानिय सभा तथा शिखर र चौतारी रेडियो स्रोता समुहका सदस्य र स्थानिय बासीन्दाहरुको उपस्थिति रहेको थियो ।

सिन्धुली जिल्लाको कमलामाई नगरपालिकामा हुराडेक नेपाल दोलखाद्वारा सञ्चालित पारस्परिक जवाफदेहिता कार्यक्रम अन्तर्गत संचालन भएको साझासभाले स्थानीय तहमा रहेको बिषयगत सेवालाई प्रभावकारी बनाउन दोहोरो संवाद सहितको अन्तरक्रिया कार्यक्रम सम्पन्न गरेको छ । शिक्षा ,स्वास्थ्य, कृषि, विपद् जोखिम ब्यवस्थापन सम्बन्धी समुदायमा रहेका समस्याहरु, स्थानीय तहको बैठक, श्रोता समुह, स्वास्थ्य सञ्जाल सार्वजनिक निजी समुहको अन्तरक्रिया, सञ्चार माध्यम र सरोकारवाला मार्फत प्राप्त भएका सवालहरुमा बिषयगत कार्यलयका प्रमुख तथा प्रतिनिधी स्थाननिय तहका प्रमुख तथा प्रतिनिधीसंग छलफल गरी निश्कर्ष निकालिएको हो ।  

सो अवसरमा सिन्धुली जिल्ला अस्पतालको लागि औषधि खरिदको टेन्डर आव्हान नभएको, जिल्लाका अधिकांश स्वास्थ्य केन्द्रमा राज्यले ब्यवस्था गरे अनुसारका औषधीहरु उपलब्ध नभएको , स्वास्थ्य संस्थामा दरबन्दी अनुसारको कर्मचारीहरु नभएको, नियमित रुपमा गाउँघरमा क्लिनिक सञ्चालन नभएको बारे छलफल भएको थियो । साथै स्वास्थ्य निकायका यस्ता समस्याहरु कमलामाई नगरपालिका, हरिहरपुरगडी गाउँपालिका, गोलन्जोर गाँउपालिका र तिनपाटन गाँउपालिका लगायतका अन्य  स्थानमा समेत रहेको बताइएको थियो ।

उठेका समस्याहरुको समाधानका लागि जवाफ दिँदै जिल्ला जनस्वास्थ्य कार्यालय सिन्धुलीका प्रमुख गुजेश्वर श्रेष्ठले स्थानिय तहको संरचना फेरबदल भएसंगै बजेटहरु सबै स्थानिय तहमा गइसकेको र स्थानिय तहमा औषधी खरिद प्रक्रियामा केहि ढिलाई भएकाले त्यस्तो समस्या आएको हुनसक्ने बताउनुभयो । त्यसैगरी गोलन्जोर गाँउपालिका र फिक्कल गाउँपालिकाको स्वास्थ्य चौकीमा भएको कर्मचारी अभाव पुर्ति भैसकेको र सरकार स्थानिय तहका स्वास्थ्य निकायहरुमा माग अनुसारको औषधी दिन तत्पर रहेकोले कुन स्वास्थ्य संस्थामा कति औषधी आवश्यक छ भन्ने कुराको तथ्याङ्क लिएर औषधी पुर्‍याउने प्रतिवद्धता ब्यक्त गर्नुभएको छ ।

त्यसैगरी शिक्षा क्षेत्रका समस्या बारे छलफल गर्दा सहभागी मध्ये कमलामाई नगरपालिका २ का बिनय दाहालले समयमा नै पाठ्यपुस्तक उपलब्ध नहुने, समयसापेक्ष पाठ्यपुस्तक उपलब्ध नहुने र तिनपाटन गाउँपालिकाको मावि रिट्ठे आम्बेटेमा पुस्तकालयको लागि भनेर निकासा गरिएको ६ लाख ५० हजार पैसाले अहिलेसम्म पुस्तकालयको ब्यवस्था नगरिएको र अन्य ठाँउहरुमा पुराना पुस्तकहरु सट्टापट्टा गरी बिक्री बितरण गर्ने समस्या रहेको पाईयो यस्ता समस्याको समाधान कसरी गर्न सकिन्छ भन्ने जिज्ञासा राख्नु भएको थियो । त्यसैगरी स्थानिय सभाको बैठकले सिन्धुली जिल्लालाई साक्षर घोषणा गरिसक्दा पनि अँझै पनि १४ देखि ५९ बर्षको समुहका ब्यक्तिहरु निरक्षर भेटिएको सवाल पनि छलफलमा आएको थियो ।