सारीरिकका साथै मानशिक पिडाबाट पनि महिला पिडित

ममता भट्ट, डडेलधुरा 

अमरगढी नगरपालिका उपमेयर संगिता भण्डारीले महिलालाई आवाजले पनि पिडादिने गरेको एक कार्यक्रममा बताउकीछन् ।उनले महिलालाई कमजोर पार्न चरित्रका कुरा गरेर महिलालाई बोलीबाट पिडादिने चलन निकै बढेकामा चिन्ता व्यक्त गरिन् ।

१११ अाैं अन्तरराष्ट्रिय श्रमिक महिला दिवसका अवसरमा ‘समान भविष्यका लागि नेतृत्वमा समावेशिता’ विषयक अन्तक्र्रिया कार्यक्रममा भण्डारीले राजनीति तथा सामाजिक सेवामा लागेका महिलालाई पछिल्ला दिनहरूमा चारित्रिक प्रहार बढेको बताइन्।


अधिकारकर्मी सोनि भण्डारीले छोरीलाई कन्यादान गरेर दिने चलन गलत भएको बताउँदै “छोरी अंश र बंश हो, हामी त्यही छोरी दान गरेर दिन्छौँ”, ।  उनले भनिन्, “यो गलत हो, अहिले आत्महत्या गर्नेमा महिलाको सङ्ख्या बढी छ, विकल्प नदेखेर महिलाले आत्महत्या गर्न बाध्यहुन्छ, यसलाई रोक्न छोरीमाथि भइरहेको अत्याचार रोक्न छोरीलाई बलियो बनाउन आवश्यक छ ।”


महिला नेत्री पदमा गुरुङले हिंसा न्यूनीकरणका लागि योजना बनाएर काम गर्न जरुरी रहेको बताइन् । “पुरुषसँग प्रतिस्पर्धा गर्ने महिलालाई राजनीतिबाट पनि पाखा लगाइन्छ”, उनले भनिन्, “हामीले कति दिन दिएको मात्र खाने ? अब हामी बलियो बन्न आवश्यक छ ।”


शिक्षक निर्मला बिष्टले जन्मिँदा एउटै प्रकृति र पीडा भोगेर जन्मिएका छोराछोरीबीच विभेद गर्नु गलत रहेको बताइन् । “छोरा रातिसम्म नआउँदा पनि सोधिन्न, छोरीलाई ६ः०० बजेपछि घर बाहिर जान छुट छैन”, उनले भनिन्, “छोरालाई छाडा नबनाएको भए छोरी बलात्कृत हुने थिएनन् ।”


FWDO कि सँयोजक सुनिता गैरेले समान व्यवहारका लागि नेतृत्वमा रहेका महिला, राजनीतिमा आबद्ध भएका, सामाजिक अगुवाले घरबाटै थालनी गर्नुपर्ने बताइन् । “तपाईहरु कति जनाले छोराछोरी दुवैलाई बराबरी काम र अवसर दिनुभएको छ”, गैरेले भनिन्, “जन्मदेखि नै छोरीलाई गरिने विभेद अन्त्य गर्न महिला, पुरुष दुवै सचेत हुन जरुरी छ ।”


सामाजिक अभियानकर्मी पदमा भण्डारीले महिलालाई ३३ प्रतिशत व्यवस्था संविधानले गरेकै भएपनि राजनीतिक दलले व्यवहारिक रुपमा महिलालाई अवसर दिने कुरा व्यवहारमा उतार्न नसकेको बताइन् । “महिला पढेलेखे पनि स्वतन्त्र छैनन्, चरालाई पनि स्वतन्त्रता चाहिन्छ भने हामी मानिस हौँ”, उनले भनिन्, “हामीलाई सरकारले पनि ठगेको छ, पुरुष नेतृत्वले पनि ठगिरहेका छन् ।” त्यसैले यसका लागी नितीगत रूपबाट जानु जरूरी छ ।