ब्लगिङ गर्न गाह्रो पनि होइन तर त्यसो भन्दैमा ब्लगिङ त्यति सजिलो पनि छैन : मनकुमारी ठाडा

धनकुटा कि मनकुमारी ठाडा मानबशास्त्र संकायको बिद्यार्थी हुन् । मनकुमारी प्लान इन्टरनेशनल नेपालको क्षेत्रिय कार्यालय बागलुङ्गमा कार्यरत छिन् । साहित्यीक पुस्तकहरु पढ्न मनपराउने मनकुमारीले एउटा मगर भाषाको कबिता संग्रह पनि प्रकाशित गरिसकेकी छन् । नयाँ ठाँउ घुम्न तथा पैदल यात्रा गर्न असाध्यै मनपराउने मनकुमारीलाई साथीहरुसँग भेटघाट गर्न र संगित सुन्न पनि उत्तिकै मनपर्छ ।  फुर्सदमा कथा अनि कबिता लेख्न मनपराउने मनकुमारी ब्लग लेखनमा पनि उत्तिकै सक्रिय छिन् । मेरो रिपोर्टको साप्ताहिक स्तम्भ साताका ब्लगरमा आज हामीले उनै मनकुमारी ठाडासँग कुराकानी गरेका छौं । प्रस्तुत छ उनीसँग गरिएको कुराकानी

आफुलाई के भनेर चिनाउन चाहानुहुन्छ ?

म एक साधारण नेपाली चेली त्यस्तो खास केही पहिचान छैन । म मात्र मनु ठाडा हुँ ।  अरु नेपाली सरह जिबन गुजार्ने क्रममा बाग्लुङ्गलाई कार्यथलो बनाई काम गरिरहेकी छु ।

ब्लगिङ नै किन ?

लेखन मेरो रुचि हो,जसले मलाई ब्लगिङसम्म जोड्न सफल भयो । खासमा मलाई केही आफ्ना भावनाहरु लेख्न मन पथ्र्याे, लेख्थे तर त्यो कुरा नेपालका ठुला अखबारमा छापिने कुरै थिएन  । त्यसैले आफ्ना कुरा राख्न ब्लगिङ भरपर्दो माध्यम लाग्यो ।

कसरी ब्लग शुरु गर्नुभयो ?

केहि कुराहरु लेख्थे, साथीहरुलाई सुनाउँथे, कतिलाई त्यो बिषयमा रुचि हुन्न थियो वास्ता गर्दैन थिए, कोहि साथीहरुले राम्रो लेख्ने रहेछौ लेख भनेर हौसला दिन्थे । तिनै लेख रचनालाई साथीहरु भन्दा बाहिरी सर्कल सम्म पुराउनलाई ब्लग सुरु गरे भन्नु पर्ला ।

ब्लगबारे कँहा सुन्नुभयो या कसैले तपाईलाई ब्लगबारे बतायो  ?

सन् २००८ तिर, म जति खेर म मार्टिन चौतारी भन्ने एक संस्थामा काम गर्थे । त्यँहा अध्ययन अनुसन्धानका कुराहरु हुन्थे, साथै बिभिन्न छलफलका कार्यक्रमहरु हुन्थे । त्यस्ता कार्यक्रमहरुमा सहभागी हुदा मलाई पनि केहि लेख्न मन लाग्थो, दैनिक जिबनमा भोगेका कुराहरुलाई त्यहि भित्रका साथीहरुलाई सुनाउथे, त्यसै बखत मेरो एक जना साथी (कैलाश राई) ले ब्लग बनाउनु भएछ । उनै मार्फत मैले भने पहिलो पटक फ्रि को डोमेन प्रयोग गरेर यसरी आफ्ना लेख रचनालाई अनलाईनमा राख्न मिल्छ भन्ने कुरा थाहा पाएकी थिए । उनै साथीको सल्लाह अनुसार मैले ब्लग बनाएकी हुँ ।

 केका लागि ब्लगिङ गर्नुहुन्छ ?

आफ्नै आत्मसन्तुष्टिका लागी म ब्लगिङ गर्छु । हो यसबाट मैले केहि सुचना, जानकारी वा जनचेतना पनि फैलाउन सक्छु तर यहाँ कति नै मानिस छन् र जो ब्लग हेर्छन ? यद्यपी आफुलाई लागेका कुराहरु ब्लग मार्फत शेयर गर्छु यी कुराहरु एक दुई जनाले हेरे होलान भनेर चित्त बुझाउँछु ।

ब्लगिङका लागि विषयवस्तु कसरी छान्नुहुन्छ ?

खासमा ब्लगिङ गर्नकै लागि भनेर विषयवस्तु कहिले पनि छान्दिन । जे मनमा आउँछ त्यो लेख्छु अनि पोष्ट गर्छु ।

तपाईले http://mgrgeen.blogspot.com/ बाहेक अरु पनि चलाउनु हुन्छ

मेरो ब्लग त यहि एउटा हो । यसैलाई निरन्तरता दिन त कति गाह्रो हुन्छ अरु के चलाउनु र? तर कहिले काहि www.wenepali.com  भन्ने अनलाईन पत्रिकालाई केहि लेखहरु तयार गर्छु ।

अनि ब्लगिङ गर्न कत्तिको सजिलो छ  त

ब्लगिङ गर्न गाह्रो पनि होइन तर त्यसो भन्दैमा ब्लगिङ त्यति सजिलो पनि छैन । सजिलो यस मानेमा कि, यो फ्रि हो, इन्टरनेट चल्ने ठाँउमा सहजै उपलब्ध हुन्छ । आफुलाई लागेका कुराहरु कसैको रोकटोक बिना पोष्ट गर्न पाइन्छ । तर गाह्रो यस मानेमा कि एक पटक बनाई सकेको ब्लगलाई निरन्तरता दिन, यसलाई आवश्यक विषयहरु तयार गर्न र पोष्ट गर्न । र ब्लग रोचक, सन्देश मुलक वा जानकारी मुलक बनाउन सके राम्रो हुन्छ र लेखन शैलीमा मिठास ल्याउन सके अझ राम्रो, यि कुराहरुलाई ध्यानमा राखेर समय अभाबमा ब्लगिङ गर्न त्यति सजिलो पनि छैन ।

तपाईको  ब्लग पढेर पाठकले कस्तो प्रतिक्रिया दिनु हुन्छ ?

 धेरैले लेखन शैली राम्रो छ भन्नु हुन्छ । 

ब्लगिङ बाहेक तपाईको रुचिका विषय के के हुन?

ब्लगिङ्ग बाहेकका मेरा रुचिहरु धेरै छन् । एउटा रुचि समाज र यसको प्रकृयालाई बुझ्नु पनि हो । जुन मैले हाल गरि रहेको कामबाट पनि गरि रहेकी छु ।

ब्लग लेखन वा ब्लगमा समेटिएका सामग्रीसँग जोडिएका कुनै रमाइला घटना वा प्रसंग भए बताइ दिनहोस न ।

त्यस्तो रमाइला घटनाहरु नै त खासै छैनन्। हालै पोष्ट गरिएको कथा हर स्टोरी  मेरो एक जना प्यारी बहिनी (साथी)को फेसबुक स्टाटसहरुको संग्रह हो । उनले दिनमा ३, ४ वटा स्टाटस राख्थिन अनि मैले एक दिन भने साने तिम्रो स्टाटस देखेर त म नै एउटा कथाको पात्र बनि सके मलाई सबै संग्रह गरेर दिन्छौ भने म कथा बनाई दिन्छु, उनले खुबै उत्साहित भएर हुन्छ भनिन र तुरुन्तै सबै स्टाटस संकलन गरेर पठाइन तर मेरो कार्यब्यस्तताले केही ढिलो ति स्टाटसहरुलाई  कथाको रुप दिए । उनि यति खुसि भइन कि एकछिनलाई मानौ उनको मनको ठुलै इच्छा पुरा भयो । यस्तै हुन् खासै यसबाहेक रमाईलो खासै अहिले सम्झिन सकिन तर मैले ब्लगिङ्गबाट धेरै साथीहरु बनाएकि छु जो अहिले फेसबुक मार्फत जोडिएका छौ‌ंं। 

केहीले ब्लगिङलाइ नागरिक पत्रकारिता पनि भन्ने गरेको पाइन्छ, के ब्लगिङ नागरिक पत्रकारिता नै हो त ?

केहि हद सम्म हो । तर नागरिक पत्रकारिता मात्र नभएर यसभित्रको बिषयबस्तुको प्रकृतिलाई हेरेर पनि यसलाई ब्याख्या गर्न सकिन्छ ।

अनि आफ्नो रुचिको विषयलाई ब्लगमा कत्तिको समाबेश गर्नु भएको छ?

थुप्रै छन्, कथा, कबिता, घुमघाम तथा समसायिक बिषयलाई ब्लगमा राखेकी छु यिनीहरु मेरा रुचिकै बिषयहरु हुन् । सबै भन्दा मुख्य कुरा त मेरो रुची लेखन हो जसलाई निरन्तरता दिन ब्लगले साथ दिएको छ ।

अन्त्यमा,

मैले यसरी ब्लगर  अफ द विक भन्ने पनि हुन्छ भन्ने सोचेको थिइन, थाहा पाए । धन्यवाद !

Comment

You need to be a member of MeroReport to add comments!

Join MeroReport

© 2017   Created by Equal Access for the Civil Society: Media Accountability Project (CS:MAP) implemented by FHI 360 with the funding support from United States Agency for International Development (USAID). The contents of this website are the sole responsibility of CS:MAP and do not necessarily reflect the views of USAID or the United States Government.   Powered by

Badges  |  Report an Issue  |  Terms of Service